Yster slyp yster, vriende vorm mekaar. Spreuke 27:17, 1983-vertaling

 

God het ons nie gemaak om alleen te groei nie. Hierdie vers gebruik die beeld van yster wat yster slyp – 'n proses wat wrywing en kontak vereis. Net so gebruik God verhoudings om ons karakter te vorm, ons denke te verdiep en ons geloof te versterk.

 

Ware vriendskap is meer as net lekker gesels en gedeelde belangstellings. Dit sluit eerlike gesprekke, aanspreeklikheid en aanmoediging in. Soms sê 'n vriend iets wat ons uitdaag of korrigeer. Dit voel dalk ongemaklik, maar soos slypwerk maak dit ons skerper en sterker.

 

Ons het mense nodig wat ons nader aan God trek, nie weg van Hom nie. Wys vriende help ons om reg te kies wanneer emosies of druk ons wil oorheers. Hulle herinner ons aan waarheid wanneer ons moedeloos of verward voel.

 

Partykeer is onsself `n invloed op ander. Die vraag is nie net wie ons slyp nie, maar ook wie óns slyp. Dra ons by tot ander se groei? Spreek ons lewe, waarheid en liefde in hul lewens in?

 

Gesonde verhoudings vra nederigheid. Ons moet bereid wees om te leer, te luister en soms te verander. Maar die resultaat is die moeite werd: mense wat saam met ons sterker word in wysheid en geloof.

 

God gebruik mense as gereedskap in ons vormingsproses. Wanneer ons dit aanvaar, begin ons selfs uitdagende verhoudings sien as geleenthede vir groei.

 

Gebed: Here, dankie vir die mense wat U in my lewe geplaas het. Help my om leerbaar te wees en ook 'n bron van aanmoediging en waarheid vir ander te wees. Gebruik my verhoudings om my nader aan U te vorm. Amen.